Lİ VÊ HELBESTA TİRÊJ

Lİ VÊ HELBESTA TİRÊJ

BAŞ GÛHDARKE

Çawa ezê te ji bîr bikim

Ey çîçeka ber vî dilî

Eşqa te har û dîn kirim

Derdê te da ser vî kulî.

Bi doz û bawerya berê

Terka te nakim koçerê

Bi cerdexan û leşkerê

Zor temir paşayê milî..!

Nakim ji bîr sebra dilan

Çavê direş ji janya kilan

Sîng mishefa şêx û melan

Ezber dilim vî rûpelî.

Pozê çilakî mermere

Tava xizêmê li sere

Mina sênîka iskendere

Xalên li dêmê gûlgûlî..!

Dêm ka`beye xan ew bere

Dêm sore lê xan agire

Xan pût û latê azere

Xan laleşe li nîva gelî.

Ey olperestê dîn û jar

Xizmetê bike bi kar û bar

Nagihêje ermancê tûcar

Sofî bi dev nabe welî...!

Xizmet nebî bi roj û şev

Bawer nekî bi dil û dev

Fermo ji meydanê birev

Bê gazinû lom û gilî.

E kû nebe yarek bedew

Çi fêmdikî ji dinya xwe ew

Hovê çiyayi bê derew

Lê dibare ax û xwelî...!

Rûniştinek li nêv dîlbera

Camek ji destê esmera

Nadim bi miyonê pera

Nadim bi zêrê osmanlî

Nadim bi bexda û fiat

Nadim bi milkê rojhilat

Nadim bi zozan û xelat 

Çimek ji neynûka tilî...!!